Tomu'a tuku ha fakamalo kihe 'Otua 'ihe 'ene tauhi lelei kuo fai 'o lava ai ke tau fe'ilongaki he ngaahi 'aho ni. 'Oku fakafiefia 'aupito 'ae lava ke hoko 'a 'etau misi ko 'eni 'o mo'oni. Pea lava ai ke fokotu'u 'a 'etau ki'i peesi ni.

Fakamalo makehe kiate kinautolu kotoa pe ne nau tataki mai 'etau ngaue ni, 'o lava ai ke tau ngaue'aki 'ae founga fetu'utaki fakaeonopooni ko eni ke tau toe vaofi ange ai. 'E lava pe keu pehee, koha'atau ki'i tokoni eni kihe "vahevahe fakatekinolosia" (digital divide.) 'Oku ha sino mai 'i hono malava ke maa'usia 'a 'etau misi ni, 'a 'etau kei 'alovili moe tulifua ke mo'ui'aki 'ae moto fisifisimu'a hotau 'apiako, "Kihe Lelei Taha". Pea koia pe foki 'ae hingoa kihe'etau peesi ni.

Koha 'epoki mahu'inga 'eni 'ihe'etau mo'ui. 'Oku tau kei 'ihe vaha'a 'oe fakatamaiki moe fakapotopoto. Koe taimi 'oe vakai'i 'etau ngaahi mo'ui fakataautaha(reflection). Koe taimi ke tau fakamalo 'iha ngaahi ngaue kuo tau lava'i. Ka koe me'a mahu'inga taha, koha taimi eni 'oku te lava ai ke tala hoto kaungame'a mo'oni. 'Io, koe taimi eni 'oku fiema'u kete 'ilo ai pe ko hai 'oku te falala kiai, pea moia 'oku falala kiate kita.

Ko 'etau peesi ko eni 'oku 'ikai koe 'ai pe kihe kau komipiuta, ka kiate kitautolu kotoa pe ne tau ma'u faingamalie 'o fe'ilongaki 'ihe 'Apiako Ma'olunga 'o Tonga 'iha ngaahi vaha'a ta'u tatau. 'Oku 'ikai foki 'uhinga 'a hono fa'u 'oe peesi ni ke hikia mo kumi langilangi ha ni'ihi. 'Ikai, mole ke mama'o ha me'a pehee. Koe uho pea moe 'elito 'oe fa'u fakakaukau ni, 'oku kanokato ia 'ihe faka'amu ke toe fakaake mo fakamafana'i 'etau fetokoni'aki moe fe'ofa'aki fakatokoua.

Fakatauange ke hokohoko atu heni 'etau pikipikihama mo vaevae manava 'ihe langa famili, siasi moe fonua 'oku tau fai. Tuku pe mu'a keu toe tapou atu. Fakafisikitu'a 'i he'etau mo'ui 'ae tumutumu 'o 'etau moto tupu'a, ke fakamahino koe teu tangata 'ae Tonga High School na'e fai, ko hono teu'i 'oe TANGATA KAKATO!

Fakamolemole atu kapau 'oku 'ikai fe'unga 'ae ngaue kuo fai kihe'etau peesi ni moho'o mou ngaahi fakakaukau. Koho mau lelei taha pe eni, pea te mau kei hokohoko atu pe foki 'i hono fai homau lelei taha ke tauhi mo fakalelei'i 'etau ngaue ni 'ihe kaha'u na.

'Ofa ke mou ma'u ha ngaahi 'aho malolo fakakilisimasi fiefia, pea pehee foki kiha ta'u fo'ou monu'ia. Fakatauange kihe Tu'i 'oe Langi kene fai hotau tataki moho tau tokonia 'ihe ngaahi ngaue moe fatongia kotoa 'oku tau fuesia. Ke 'a'ana hono mamafa, kae 'ataua pe hono ma'ama'a. Pea ke fakafoki mo'ona 'a e langilangi hono kotoa.

'Ofa lahi atu,